FALE ALEA ‘O TONGA
ONGOONGO TUKU ATU
MA’U ‘A E FANONGONONGO ‘OKU VAKAI’I ‘E HE FAKAMAAU’ANGA ‘A E FOUNGA NGAUE FAKA-FALE ALEA NA’E NGAUE’AKI KI HE PALOTI KE FAKAMOLOLOO’I ‘A E PALEMIA
Kuo ma’u ‘a e fanongonongo ‘o ha ‘eke faka-fakamaau’anga ki he ‘Eiki Sea mo e Fale Alea ‘o Tonga. Ko hono vakai’i faka-fakamaau’anga eni ‘o ha ngaahi tukuaki’i fekau’aki mo e founga ngāue faka-Fale Alea na’e ngaue’aki ki he fokotu’u ke fakamaloloo’i ‘a e ‘Eiki Palemia, Hon. Hu’akavameiliku, ‘a ia na’e ngāue ki ai ‘a e Fale Alea ‘i he mahina kuo ‘osí. Ko e ‘eke ko ‘eni ‘oku fakahoko ia ‘e he Hou’eiki Memipa Fale Alea ‘e toko fitu mei he toko hongofulu na’a nau fakamo’oni ki he fokotu’u ke fakamaloloo’i ‘a e Palemia. ‘Oku lolotonga fakahoko ‘a e ngaue fakalao ‘a e kau loea ‘a e fa’ahi ‘a e Fale Aleá ki he ‘eké ni.
Ko e tu’o ua ‘aki eni ‘a e ‘eke faka-fakamaau’anga pehe ni ‘o fekau’aki mo e Fale Alea ‘i he teemi faka-Fale Alea lolotongá. ‘Oku lolotonga ta’ofi fakataimi (stay) ‘a e tu’utu’uni ‘i he ‘eke faka-fakamaau’anga ‘uluakí kae‘oua ke mahino ‘a e ola ‘o e tangi ‘a e fa’ahi ‘a e Fale Aleá fekau’aki mo e tu’utu’uni ‘a e fakamaau’angá ki he mafai ‘o e fakamaau’angá ke vakai’i ‘a e ngaahi ngāue faka-Fale Aleá.
Tuku Atu ʻi he Fakangofua ʻe he Kalake Pule ʻa e Fale Aleá
ʻAho 23 ‘Okatopa 2023
ʻOfisi ʻo e Fale Alea ʻo Tonga, Nuku’alofa, Tonga
