FALE ALEA ʻO TONGA

 ONGOONGO TUKU ATU


FAKAMA’ALA’ALA FEKAU’AKI MO E VAHE ‘OKU TOTONGI MEI HE FALE ALEA KI HE FAKAFOFONGA TONGATAPU 10 ‘I HE LOLOTONGA ‘ENE MAMA’O MEI HE NGAAHI FAKATAHA ‘A E FALE ALEA

‘Oku ‘oatu ‘a e fakamatalá ni ke toe fakamahino ‘a e kaveingá ni ‘a ia ne ‘osi tuku atu ‘a e fakamatala ki ai ‘i he ongoongo tuku atu ‘o e ‘aho 18 ‘o Sanuali 2023.

‘Oku ‘ikai ke totongi ‘e he Fale Aleá ha fakamole ‘o e folau pe ngaahi faito’o faka-falemahaki ‘a e Fakafofonga Tongatapu 10, Hon. Pohiva Tu’i’onetoa, ‘a ia ‘oku ne lolotonga
‘i ‘Amelika ke fakakakato ‘ene ngaahi fiema’u faka-falemahakí ni. ‘Oku ‘ikai ke totongi ‘e he Fale Aleá ha totongi folau (travelling allowance), totongi tikite vakapuna (airfare), fakamole faka-falemahaki (medical expenses), pe ha toe fakamole pē ‘o e folaú ni pe ngaahi faito’o fakafalemahakí ni.

‘Oku kei totongi pē ‘e he Fale Aleá ki he Fakafofonga ‘ene vahe fakauike ua (fortnightly salary) ko e tefito’i vāhenga ‘a e Fakafofongá. ‘Oku totonu pea ‘oku angamaheni pē ke kei ma’u ‘e he Fakafofongá ‘ene tefito’i vāhengá koe’uhí he ‘oku ne kei hoko pē ko e Fakafofonga Fale Alea pea na’e ‘osi tali ‘e he Fale Aleá ‘ene poakí. Na’e fakangofua ‘e he Fale Aleá ‘a e poaki ‘o e vaha’a taimi ko eni ‘oku lolotonga mama’o ai ‘a e Fakafofongá mei he Fale Aleá, ‘i he founga ngāue ko e tohi ‘avetakai. Ko e founga ngāue ni ‘oku fakalao pea
‘oku fakangofua ia ‘e he Tu’utu’uni Tu’uma’u 4(1) ‘a e Fale Aleá ke ngaue’aki ki ha fa’ahinga kaveinga pē ‘e fiema’u ke fakakakato ha ngāue ki ai ‘i he lolotonga ‘a e ‘ikai
fakataha pe mālōlō ‘a e Falé.

‘Oku ‘ohake mo e fakafehu’ia ‘o e ngaahi fakamole fakafalemahaki ‘a e Fakafofongá ni ‘i he ta’u 2017 ‘oku tukuaki’i na’e totongi ‘e he Fale Aleá. ‘Oku fie fakapapau’i atu ‘oku hala ‘a e fakamatala ko iá. Na’e ‘ikai ke totongi ‘e he Fale Aleá ha fakamole fakafalemahaki pe folau faka-faito’o ‘a e Fakafofongá ni ‘i he 2017. ‘Oku ‘ikai poupou ‘a e Fale Aleá ki he tufaki ‘o e fakamatala hala fekau’aki mo e Fale Aleá kae pehē ki he Hou’eiki Memipa ‘o e Fale Aleá.
‘Oku mahu’inga ke fakatonutonu ‘a e fa’ahinga tukuaki’i hala pehe ní telia ‘a e kakai ‘o e fonuá kenau ‘ilo mo ma’u ‘a e fakamatala ‘oku mo’oní.

Tuku Atu ʻi he Fakangofua ʻe he Kalake Pule ʻa e Fale Aleá
ʻAho 10 Fepueli 2023
ʻOfisi ʻo e Fale Alea ʻo Tonga, Nuku’alofa, Tonga

 

Go to top