FALE ALEA ʻO TONGA
ONGOONGO TUKU ATU
TOHI FOKOTU’U KANITITEITI PALEMIA FAKAKATOA ‘E UA KUO FAKAHU MAI KI HE ‘OFISI ‘O E ‘EIKI SEA ‘O E FALE ALEA
Na’e tapuni ‘i he taimi 4.30pm ‘o e ‘aho ni ‘a e faingamalie ki he Hou’eiki Fakafofonga Fale Alea Kuo Fili ke fakahu atu ki he ‘Ofisi ‘o e ‘Eiki Sea ‘o e Fale Alea ha tohi fokotu’u ‘o ha kanititeiti ki he lakanga ‘o e Palemia Fili. Ko e tohi fokotu’u ‘e ua fakakatoa na’e ma’u, ‘a ia ko e fuofua tohi fokotu’u na’e ma’u ‘i he ‘aho Falaite 20 ‘o Tisema, pea ko e tohi fokotu’u hono ua ne ma’u ia he ho’ata ‘o e ‘aho ni.
Kuo tuku atu ai pe foki mei he ‘Eiki Sea ‘i he efiafi ni ‘a e tohi fanongonongo ‘o e fakataha ‘a e Hou’eiki Fakafofonga Kuo Fili ki ‘apongipongi, Tusite 24 ‘o Tisema 2024, taimi 10:00am ‘i he Fale Alea pe. Ko e fakataha eni ke fili ai ‘e he Hou’eiki Fakafofonga Kuo Fili ‘a e Palemia ‘o Tonga mei he ongo kanititeiti kuo fokotu’u mai. ‘E toki fakaha ‘i he fakataha ni ‘a e hingoa ‘o e ongo kanititeiti.
‘E fakamafola hangatonu atu ‘a e fakataha ni ‘i he ‘initaneti ‘o fakafou ‘i he peesi Facebook (FALE ALEA ‘O TONGA) mo e YouTube (Falealea Tonga) ‘a e Fale Alea, kae pehe ki he ngaahi letio mo e ngaahi kautaha ongoongo.
Tuku Atu ʻi he fakangofua ʻe he ‘Eiki Sea ‘o e Fale Alea ‘o Tongá
ʻAho 23 ‘o Tisema 2024
