13 ʻo Sepitema 2019
Ko e tā‘oku ongo pea ko e mole lahi ki Tonga, ka ko e faka-koloa ki ‘Itaniti. ‘Oku mātu’aki ongo’i mo’oni ‘e he ‘Eiki Sea pea moe Fale Alea ‘o Tonga ‘a e ui ma’a mo mā’oni’oni kuo fai ‘e ‘Otua Mafmafi ki he ‘Eiki Palemia ‘o Tonga, Hon Samuela ‘Akilisi Pohiva, ‘I ‘Aokalani Nu’usila
‘Oku ‘oatu ai e popoaki fiekaungamamahi ki he famili moe ngaahi maheni‘o e ‘Eiki Palemia, Samuela ‘Akilisi Pohiva, kuo ne tō tau ‘i he fatongia
Kimuʻa peá ne pekiá, naʻe hoko ʻa e ʻEiki Palēmiá ko e Fakafofonga Kakai fua fatongia ‘i he vaha’a taimi loloa ‘i he Fale Aleá ‘o Tonga. Naʻá ne hu ki he Fale Aleá ʻi he taʻu 1987 ʻo aʻu pē ki heʻene pekia mo hono toutou fili ko e Fakafofonga Kakai Fika ʻUluaki ʻo Tongatapu pea hili ʻa e Liliu Faka-Politikale ʻo e taʻu 2010, naʻá ne hoko ko e Fakafofonga Kakai ki he vāhenga fili ʻo Tongatapu 1. Naʻe fuofua fakanofo ʻa Hon. Samuela ʻAkilisi Pōhiva ko e ʻEiki Palēmia ʻo Tonga ʻi he taʻu 2014. Naʻe toe fakanofo foki ko e ʻEiki Palēmia ʻi he taʻu 2017 ʻa ia naʻá ne fakahoko fatongia ai pē ʻo aʻu ki heʻene pekia ʻi he ʻaho 12 ʻo Sepitema 2019.
ʻE manatua moʻoni ʻe he Fale Aleá ʻa e ʻEiki Palēmiá ko e tokoni mahuʻinga mo maʻongoʻonga naʻá ne fakahoko ki he tuʻunga fakapolitikale mo fakatemokalati lolotonga ʻo Tongá. Naʻá ne taukaveʻi loto-toʻa ʻa e temokālatí pea mo e liliu fakapolitikalé. Ko ha tokotaha Faʻu Lao mateaki naʻe tukupā ʻene moʻuí kakato ke ngāue maʻá e kakai ʻo Tongá.
ʻOku mau fakakaukaua mo lotua moʻoni ʻa e fāmili mo e kāinga ʻo e ʻEiki Palēmiá ʻi he taimi matuʻaki faingataʻá ni.
- Ko e ʻEiki Tokoni Sea ʻo e Fale Aleá
-ENDS-