FALE ALEA ʻO TONGA
ONGOONGO TUKU ATU
TEUTEU KE FAKAHIFO (UNSEAT) MEI HE FALE ALEA HA TOE MEMIPA FALE ALEA KEHE ‘E TAHA
Kuo maʻu ʻe he ʻEiki Sea ʻo e Fale Aleá, Lord Fakafanua, ʻi he ʻaho 6 ʻo Mē 2022 ʻa e Tohi Fakamoʻoni ʻa e Fakamaauʻangá ʻo fakahā hono fakataʻeʻaongaʻi ʻi he Fakamaauʻanga Lahí ʻa e fili ʻo e Fakafofonga Fale Alea ʻo Tongatapu 4, Tatafu Toma Moeaki, ʻi he fili Fale Alea ne fakahoko ʻi he ʻaho 18 ʻo Novema 2021. Ko e ola eni ʻo e hopo ʻa Moeaki ko e kole tuʻunga ʻi he fili (election petition), ʻi he hia ko e totongi ke fakalotoʻi (bribery).
Makatuʻunga ʻi hono fakataʻeʻaongaʻi ʻe he Fakamaauʻanga Lahí ʻa e fili ʻo e Fakafofongá ni, ʻoku tuʻutuʻuni ʻe he Lao ki he Fili Fale Aleá kuo pau ke fakahifo (unseat) ʻe he Fale Aleá ʻa e Fakafofongá ni mei hono sea ʻi he Fale Aleá. ʻE fakahoko ʻa e fakahifo ko iá ʻi he fakataha ʻa e Fale Aleá ʻe fakahoko ʻi he ʻaho 16 ʻo Mē 2022. Ka hili iá, ʻe lau leva kuo ʻatā ʻa e sea ʻo Tongatapu 4 ʻi he Fale Aleá, pea ʻe tuku atu leva ʻe he ʻEiki Sea ʻo e Fale Aleá ki he Komisoni Filí ʻa e tohi fakangofua ke fili ha Fakafofonga foʻou maʻa Tongatapu 4. ʻE toki femahinoʻaki ʻa e ʻEiki Seá pea mo e Komisoni Filí ki he ʻaho ke fakahoko ai ʻa e fili ʻo e Fakafofonga Fale Alea foʻou maʻae Vahenga Filí ni.
Tuku Atu ʻi he Fakangofua ʻe he Kalake Pule ʻa e Fale Aleá
ʻAho 9 ʻo Mē 2022
ʻOfisi ʻo e Fale Alea ʻo Tonga, Nuku’alofa, Tonga
