‘OFISI ‘A E ‘EIKI SEA ‘O E FALE ALEA
ONGOONGO TUKU ATU
‘ATĀ KE FAI HA FOKOTU’U ‘O HA KANITITEITI KI HE LAKANGA PALĒMIÁ
Kuo ʻoatu ʻi he ʻahó ni ʻe he ‘Eiki Sea ʻo e Fale Alea ʻo Tongá, Lord Fakafanua, ʻa e fakaafe ki he kotoa ʻo e Houʻeiki Fakafofonga Fale Alea kuo fili ke nau fakahū mai haʻanau fokotuʻu ʻo ha Fakafofonga Fale Alea kuo fili ke ne hoko ko ha Kanititeiti ki he teu fili ʻo e Palēmia fo’ou ma’a Tonga. ‘Oku makatu’unga eni ‘i he ʻatā ʻa e lakanga Palēmiá hili ʻa e fakafisi ʻa e Palēmia mālōlō, Hon. Huʻakavameiliku (Siaosi ‘Ofa ki Vahafolau Sovaleni) ʻi he ʻaho Monite 9 ʻo Tisema 2024.
ʻOku ʻatā leva ʻo kamata mei he ʻahó ni ke fakahū atu ki he ʻOfisi ʻo e ‘Eiki Sea ʻo e Fale Alea ʻo Tongá ha fokotuʻu Kanititeiti ki he Palēmia Filí. ʻE tāpuni ʻa hono tali ʻo e ngaahi fokotuʻú ʻi he taimi 4:30pm ʻo e ʻaho Monite 23 ʻo Tisema 2024. Na’e ‘oatu fakataha mo e tohi ‘a e ‘Eiki Seá ki he Houʻeiki Fakafofonga Fale Alea kuo filí ha fakamatala fakama’ala’ala ‘o e founga ʻoku tuʻutuʻuni ʻe he Lao ʻo e Konisitūtone ʻo Tongá ki hono fakahū mai ʻo ha fokotuʻu peheni. ʻOku mahuʻinga ʻaupito ke faipau ʻa e fokotuʻú ki he ngaahi fiemaʻu ko ʻeni ʻa e laó, he ʻe lava ke fakataʻeʻaongaʻi ha fokotuʻu ʻo kapau ʻoku ʻikai ke faipau ki he ngaahi fiemaʻu ko ʻení.
Ko e tohi ʻo fokotuʻu ʻo ha Kanititeiti ki he Palēmia Filí ʻe toki fakaava pē ia ʻo lau ʻe he ‘Eiki Seá ʻi he ʻaho ʻe fakahoko ai ʻa e fakataha ʻa e Houʻeiki Fakafofonga Fale Alea, ʻa ia naʻe ʻosi fanongonongo atu ʻi he fakataha fakaʻosi ʻo e Fale Aleá ke fakahoko ʻi he ‘aho Tusite 24 ʻo Tisema 2024.
Tuku atu mei he
‘Ofisi ‘o e ‘Eiki Sea ‘o e Fale Alea ‘o Tonga
‘Aho 10 ʻo Tisema 2024
‘OFISI ‘A E ‘EIKI SEA ‘O E FALE ALEA
